رباعيات جاهين الجزء3

ربـاعيّـات جـاهيـن
الجـزء الثـالـث

أيوب رماه البين بكل العلل
سبع سنين مرضان وعنده شلل
الصبر طيب.. صبر أيوب شفاه
بس الأكاده مات بفعل الملل
عجبي
*******
سرداب في مستشفى الولادة طويل
صرخات عذاب ورا كل باب وعويل
وفي الطريق متزوّقين البنات
متزوّقين للحب والمواويل
عجبي
*******
الدنيا أوضه كبيرة للانتظار
فيها ابن آدم زيّه زي الحمار
الهمّ واحد.. والملل مشترك
ومفيش حمار بيحاول الانتحار
عجبي
*******
نسمة ربيع لكن بتكوي الوشوش
طيور جميلة بس من غير عشوش
قلوب بتخفق إنما وحدها
هي الحياة كده.. كلها في الفاشوش
عجبي
*******
يا طير ياعالي في السما طظ فيك
ما تفتكرشي ربنا مصطفيك
برضك بتاكل دود وللطين تعود
تمص فيه يا حلو.. ويمص فيك
عجبي
*******
كروان جريح مضروب شعاع م القمر
سقط من السموات فؤاده انكسر
جريت عليه قطة علشان تبلعه
أتاريه خيال شعراء ومالهوش أثر
عجبي
*******
ما حد في الدنيا واخد جزاته
ولا حد بيفكر في غير لذاذاته
ما تعرفيش يا حبيبتي.. أنا وانتي مين؟
إنتي عروس النيل.. وأنا النيل بذاته
عجبي
*******
رقاصه خرسا ورقصة من غير نغم
دنيا.. يامين يصالحها قبل الندم
ساعتين تهز بوجهها يعني
يترجرجوا نهديها يعني نعم
عجبي
*******
إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الفرس
الدنيا قالت.. قام خطفها الشيطان
عجبي
*******
ياللي نصحت الناس بشرب النبيت
مع بنت حلوة.. وعود, وضحك, وحديت
مش كنت تنصحهم منين يكسبوا
تمن ده كله؟.. ولاّ يمكن نسيت
عجبي
*******

عزيزتى
ختيارك يعبر بما فيه من احاسيس وصور عميقة عن ما تملكيه من ذوق راقي ومشاعر متدفقة
شكرا على مشاركتك والى الامام